БНСУ-ын Үндэсний тагнуулын алба (NIS)-наас Хойд Солонгосын удирдагч Ким Жон Уны охин Ким Жү Эг тус улсын дараагийн залгамжлагч гэж үзэх хангалттай үндэслэл бүрдсэнийг зарлалаа. Хэдийгээр Пхеньяны зүгээс албан ёсны мэдэгдэл хийгээгүй байгаа ч тагнуулын байгууллага түүний улс төр дэх байр суурь эрс бэхжиж байгааг онцолж байна.
Залгамжлах магадлал хамгийн өндөр: Өмнөд Солонгосын парламентын хаалттай хурлын үеэр Тагнуулын албаны дарга Ли Жон Сок "Ким Жү Эг Хойд Солонгосын ирээдүйн удирдагч гэж харах нь зөв" хэмээн гишүүдийн асуултад шууд хариулт өгчээ.
Ким Ё Жонд өрсөлдөх эрх мэдэл байхгүй: Олон улсын шинжээчдийн таамаглаж байсан Ким Жон Уны дүү Ким Ё Жоны зүгээс ирж болох эсэргүүцлийн тухайд тагнуулын алба "Түүнд залгамжлагчийн асуудалд нөлөөлөх, эрх мэдлийн төлөө өрсөлдөх бодит боломж байхгүй" гэж үзэж байна.
Цэрэг, зэвсгийн салбарт байр сууриа бэхжүүлж байна: Сүүлийн жилүүдэд Ким Жү Э пуужингийн туршилт, цэргийн сургуулилт зэрэг зэвсэгт хүчний чухал арга хэмжээнд аавыгаа тогтмол дагалдах болсон. Энэ нь түүнийг зөвхөн "хайртай охин" биш, харин "цэргийн удирдагч" гэх дүр төрхөөр армийнханд хүлээн зөвшөөрүүлэх зорилготой аж.
Хэдийгээр залгамжлагч тодорхой болж байгаа ч дараах хоёр хүчин зүйл анхаарал татсаар байна:
Уламжлалт нийгэм: Хойд Солонгос нь эцгийн эрхт ёс давамгайлсан нийгэм тул эмэгтэй удирдагчийг хүлээн зөвшөөрөхөд хугацаа шаардлагатай.
Ким Жон Уны нас: Одоо 42 настай Ким Жон Уны хувьд эрх мэдлээ шилжүүлж өгөхөд дэндүү залуу байгаа тул залгамжлагчийг зарлах нь зөвхөн бэлтгэл шат юм.
1948 оноос хойш Ким ивгийн эрчүүд үе залгамжлан удирдаж ирсэн (Ким Ил Со Ким Жон Ил Ким Жон Ун). Хэрэв Ким Жү Э эрх мэдэлд хүрвэл Хойд Солонгосын түүхэн дэх анхны эмэгтэй удирдагч болох юм.
Сэтгэгдэл (0)
Одоогоор сэтгэгдэл байхгүй байна.
Эхний сэтгэгдлээ үлдээнэ үү!
Сэтгэгдэл нэмэх